काठमाडौं । अखिल नेपाल फुटबल संघ (एन्फा)का अध्यक्ष गणेश थापा २० हजार स्वीस फ्रयांक अर्थात् नेपाली झण्डै २१ लाख जरिवाना सहित १० वर्षका लागि निलम्बनमा परेका छन् ।
विश्व फुटबल महासंघ (फिफा)ले उनलाई निलम्वन गरेको हो । भ्रष्टाचारको आरोपमा फिफाको अनुशासन कमिटीले एन्फा अध्यक्ष थापालाई सो कारवाही गरेको जनाएको छ ।
फिफाले सन् २००९ र २०११ को फिफा चुनाव र एसियाली फुटबल महासंघको चुनावमा थापाले भ्रष्टाचार गरेको ठहर समेत गरेको छ ।
मलाई अन्याय गर्यो : थापा
अध्यक्ष गणेश थापाले फिफाले आफूलाई अन्याय गरेको बताएका छन् । आज एक विज्ञप्ति जारी गर्दै उनले भनेका छन्, ‘मैले आज बिहान फिफाको अनुसाशन कमिटीले मलाई १० वर्षका लागि फुटबलबाट प्रतिवन्ध लगाएको जानकारी पाएँ । म एकदमै निराश छु र मलाई यसमा न्याय भएको जस्तो लाग्दैन ।’
उनले आफूलाई निर्दोष सावित गर्नका लागि लड्ने समेत बताएका छन् । उनले आँफुलाई कारबाही गर्नुको कारण माग्ने पनि र मुद्दा हाल्ने जनाएका छन् ।
लेखकको बारेमा
प्रतिक्रिया