सैलुङ (दोलखा) । दोलखाको सैलुङ र क्यानडाको नायग्रा फल्सनजिक रहेको सिन्हामटन गाउँबीच मितेरी सम्बन्ध कायम भएको छ । क्यानडाका अर्गानिक अभियन्ता मास्टर सेफ माइकल स्ट्याडल्यान्डर र उनकी श्रीमती नोबुयु स्ट्याल्यान्डर समावेस भएको मंगबार आयोजित कार्यक्रममा सैलुङ सिन्हामटनबीच मितेरी लगाइएको हो ।

क्यानडाको ख्यातिप्राप्त अर्गानिक हिरो उपाधिसमेत पाएका मास्टर सेफ माइकल स्ट्याडल्यान्डरले विगत दुई दशकदेखि सिंघमटमलाई अर्गानिक गाउँमा परिणत गरेका छन् ।

उनले खानी उत्खननबाट सो गाउँलाई बचाउने अभियान नै चलाइ जैविक खेतीलाई प्रबद्र्धन गरी क्यानडाभरिमै उत्कृष्ट अर्गानिक गाउँमा परिणत गरेका थिए । उनले सोही गाउँमा आफ्नो लोकप्रिय अर्गानिक रेष्टुरेन्ट समेत सञ्चालन गर्दै आएका छन् ।

“नेपाल प्राकृतिक सौन्दर्यले विश्वलाई नै मन्त्रमुग्ध बनाउने देश हो, यहाँको परम्परागत जैविक विधिमा आधारित खेती प्रणालीबारे मैले सुन्दै आएको छु,” सेफ माइकलले भने ।

तर, आधुनिक विषादी र रसायनिक मलहरूको प्रयोगले जैविक विविधता र बाली विविधतामा असर पारेको छ । हामी मिलेर नेपालमा परम्परागत आधुनिक विषादीरहित खेती र पर्यावरणमा आधारित पर्यटन सँगै अगाडि बढाउन सक्छौ ं।

सिंघमटम टु सैलुङ’ अभियानको घोषणा गर्दै कार्यक्रमबीच दुई देशका गाउँहरूबीच मितेरी लगाइएको हो । सेफ स्ट्याडल्यान्डरले सैंलुङका किसानहरूलाई आफ्नो मौलिक र परम्परागत खेती प्रणालीलाई बचाउँदै पर्यटन प्रबर्द्धन गर्न सघाउने बताए ।

रैथानी बालीमा नेपाल धनी भए पनि त्यसलाई बचाउने पहल नभएको र देखासिकी गर्दै अनावश्यक रसायनिक मल र कीटनाशकको बढी प्रयोग गर्दा ती रैथाने बीउबिजन र बाली नष्ट भएको देखेपछि क्यानडाली अर्गानिक अभियन्ता स्ट्याल्यान्डर स्तब्ध भएका थिए । उनले यदि नेपालको मौलिक पहिचानलाई बचाउने हो भने परम्परागत जैविक खेतीप्रणाली फर्कनुको विकल्प नरहेको बताए ।

क्यानडा सेफ कंग्रेसका संस्थापकसमेत रहेका स्ट्याडल्यान्डरले रसायनिक मल, आधुनिक विषादी प्रयोग नगरीकनै यहाँको पर्यटन र पर्यावरणलाई कसरी प्रबद्र्धन गर्न सकिन्छ भन्ने विषयमा पहल गर्ने अभियानका आयोजक गेट कलेजका प्रमुख कार्यकारी अधिकृत खेम लकाईंले जानकारी दिए ।  सन् २०२० सम्ममा सैलुंगेश्वर गाविसलाई ’इको भिलेज’मा परिणत गर्ने लक्ष्यअनुसार यो अभियान सञ्चालन गरिएको हो ।

लेखकको बारेमा

अर्थटुडे