काठमाडौं । सञ्चालकहरुले कानुन तथा सहकारी विभागको निर्देशन विपरित हुने गरी दोहोरो पद लिएकोबारे संघिय सहकारी विभागले राष्ट्रिय सहकारी बैंक र नेपाल  बचत तथा ऋण केन्द्रीय सहकारी संघ  (नेफ्स्कून) लाई स्पष्टिकरण सोधेको छ । विभागले शुक्रबार दुवै निकायलाई पत्राचार गर्दै दोहोरो पदको विषयमा यथार्थ अवस्था जानकारी दिन भनेको छ ।

सहकारी बैंक र नेफ्स्कूनका सञ्चालकहरुले कानुन विपरित दोहोरो पद लिएको र विभागको निर्देशन अनुसार यसको कार्यान्वयन नगरेको समाचार प्रकाशित भएपछि विभागले काम देखाउनै काम देखाउनकै लागि स्पष्टिकरण सोधेको हो ।

विभाग स्रोतका अनुसार समाचार प्रकाशित भएपनि मन्त्रालयसम्म चासो भएकाले नै स्पष्टिकरण सोधिएको हो । तर, अटेरी गर्नेलाई कारवाही गर्ने अवस्थामा विभागको नेतृत्व छैन ।

सहकारी ऐन -२०७४ मा एउटै व्यक्ति एक भन्दा बढी संघसंस्थाको सञ्चालक बस्न नपाउने व्यवस्था छ । उक्त प्रावधान कार्यान्वयन गर्न नियामक निकाय सहकारी विभागले पटक पटक निर्देशन समेत जारी गर्दै आएको छ । तर, महासंघदेखि प्रारम्भिक सस्थासम्म कानुनको खिल्ली उडाउँदै, विभागको निर्देशनलाई अटेर गर्दै अधिकांश संचालकहरु दोहोरो तथा तेहेरो पदमा बसिरहेका छन् ।

सहकारी ऐन कार्यान्वयन गराउने जिम्मेवारी बोकेको विभागको नेतृत्व आफ्नै निर्देशन कार्यान्वयन नहुँदा मुकदर्शक मात्र बनेको छ । सहकारी महासंघदेखि तल्लो तहका संघहरुसम्म नेताहरुले दोहोरो पदको कार्यान्वयन नगर्दा पनि विभागले कुनै कारवाही गर्न सकेको छैन ।

याे पनि पढ्नुहाेस्

सहकारीमा ऐन विपरित दोहोरो पद कायमै, आफ्नै निर्देशन कार्यान्वयन गर्न विभाग असफल

महासंघमै वरिष्ठ उपाध्यक्षसहित अधिकांश संचालक ऐन विपरित दोहोरो पदमा, सहकारी विभाग मुकदर्शक

लेखकको बारेमा

अर्थटुडे