दोहोरो शेयर भरेको पाएपछि माथिल्लो तामाकोशीको सेयर बाँडफाँडमा ढिलाई, मंगलबार शेयर बाँडफाँड हुने

काठमाडौं । माथिल्लो तामाकोशीले जारी गरेको प्राथमिक शेयर बाडफाँडमा केही समस्या देखिएपछि केही समय ढिला भएको छ । सर्वसाधारणहरुले दोहोर्याएर आवेदन दिएको पाइएपछि शेयर बाँडफाँडमा ढिलाई भएको हो ।

सो आयोजनाको विक्रि प्रबन्धकको जिम्मा पाएको नागरिक लगानी कोषले छानविन गर्दा करिव ६ हजार भन्दा बढीले दोहोर्याएर आवेदन दिएको भेटेको छ । नागरिक लगानी कोषका मर्चेन्ट बैंक विभागका प्रमुख रोशनजंग कार्कीका अनुसार दोहोर्याएर आवदेन दिनेको आवेदन रद्ध हुनेछ ।

उनका अनुसार योग्य आवेदन सिडिएससीमा पठाउने काम भैरहेको र आगामी मंगलबार शेयर बाँडफाँड गरिने छ । सर्वसाधारणको लागि निष्काशन गरिएको आइपिओमा तीन लाख ४६ हजार १६६ जनाले ६ अर्ब ७० करोड रुपैयाँको लागि आवदेन दिएका थिए । ६ हजार आवेदकको आवेदन रद्ध भएसँगै अधिकतम ५० कित्ता शेयर पाउनेको संख्या बढ्ने कार्कीले जानकारी दिए ।

कम्पनीले कात्तिक १५ गतेदेखि १९ गतेसम्म एक करोड ५० लाख ९० हजार ७५० कित्ता शेयर सर्वसाधाणको लागि निष्काशन गरेको थियो । कम्पनीले सर्वसाधारणतर्फ एक करोड ५८ लाख ८५ हजार कित्ता मध्ये ५ प्रतिशत अर्थात ७ लाख ९४ हजार २५० कित्ता सामुहिक लगानी कोषका लागि बाँडफाँड गरिसकेको छ ।