काठमाडौं । माछापुच्छ्रे बैंकले चालु आर्थिक वर्ष २०८३/८४ को पहिलो त्रैमासमा नाफा र कर्जाको गुणस्तर दुवैमा सुधार गरेको छ । बैंकले असोज मसान्तसम्म ५५ करोड ११ लाख रुपैयाँ खुद नाफा आर्जन गरेको छ । यो गत आर्थिक वर्षको सोही अवधिको तुलनामा ३१.८६ प्रतिशत बढी हो । गत आर्थिक वर्ष २०८२/८३ को पहिलो त्रैमासमा बैंकले ४१ करोड ७९ लाख रुपैयाँ खुद नाफा कमाएको थियो ।
बैंकको नाफा वृद्धिमा खुद ब्याज आम्दानीको विस्तारले साथ दिएको छ । चालु आवको पहिलो त्रैमासमा बैंकको खुद ब्याज आम्दानी १५.५९ प्रतिशतले बढेर १ अर्ब ६८ करोड ६५ लाख रुपैयाँ पुगेको छ । गत वर्षको सोही अवधिमा यस्तो आम्दानी १ अर्ब ४५ करोड ८९ लाख रुपैयाँ थियो ।
समीक्षा अवधिमा बैंकले ४३ करोड ८५ लाख रुपैयाँ खुद शुल्क तथा कमिसन आम्दानी गरेको छ ।
बैंकको नाफासँगै वितरणयोग्य नाफा पनि सकारात्मक अवस्थामा रहेको छ । असोज मसान्तसम्म बैंकको वितरणयोग्य नाफा ११ करोड २१ लाख रुपैयाँ छ । यसका आधारमा बैंकको लाभांश क्षमता १.५१ प्रतिशत रहेको छ ।
निक्षेप र कर्जा विस्तार
चालु आवको असोजसम्ममा बैंकले निक्षेप र कर्जा दुवै विस्तार गरेको छ । असोज मसान्तसम्म बैंकको निक्षेप संकलन ३.५७ प्रतिशतले बढेर २ खर्ब २८ अर्ब ३७ करोड रुपैयाँ पुगेको छ । गत वर्षको सोही अवधिमा बैंकसँग २ खर्ब २० अर्ब ४९ करोड रुपैयाँ निक्षेप थियो ।
त्यस्तै, बैंकको कर्जा प्रवाह ५.४६ प्रतिशतले बढेर १ खर्ब ७२ अर्ब ६४ करोड रुपैयाँ पुगेको छ । गत वर्षको असोजसम्म बैंकले १ खर्ब ६३ अर्ब ६९ करोड रुपैयाँ कर्जा प्रवाह गरेको थियो । बैंकको कर्जा–निक्षेप अनुपात (सीडी रेसियो) ७७.९३ प्रतिशत कायम भएको छ ।
खराब कर्जा घट्यो
बैंकले खराब कर्जा अनुपातमा समेत सुधार गरेको छ । गत आर्थिक वर्षको पहिलो त्रैमासमा ४.१३ प्रतिशत रहेको निष्क्रिय कर्जा अनुपात चालु आवको असोज मसान्तमा घटेर ३.९७ प्रतिशतमा झरेको छ ।
१५ अर्ब ४४ करोड ८७ लाख रुपैयाँ चुक्ता पुँजी रहेको बैंकको जगेडा कोषमा ७ अर्ब ९० करोड १० लाख रुपैयाँ सञ्चित छ । बैंकको प्रतिसेयर आम्दानी १३ रुपैयाँ ४३ पैसाबाट बढेर १७ रुपैयाँ ७१ पैसा पुगेको छ ।
त्यस्तै, प्रतिसेयर नेटवर्थ १६४ रुपैयाँ ४० पैसा र मूल्य आम्दानी अनुपात १५.४२ गुणा रहेको प्रकाशित वित्तिय विवरणमा उल्लेख छ ।
लेखकको बारेमा
प्रतिक्रिया