श्रमिकले १० प्रतिशत सेवा शुल्क पाउने व्यवस्था कानुनमा नै स्पष्ट उल्लेख गर्न सांसद अधिकारीको माग

काठमाडौ । होटल तथा पर्यटन क्षेत्रमा कार्यरत श्रमिकले पाउँदैआएको १० प्रतिशत सेवा शुल्कलाई निरन्तरता दिन सांसद लिमा अधिकारीले माग गरेकी छिन् । बुधबार प्रतिनिधिसभामा बोल्दै अधिकारीले सो क्षेत्रमा काम गर्ने श्रमिकको सेवा शुल्कसम्बन्धी कानुनमा अन्यौल भएका कारण उनीहरुको पारिश्रमिक र सामाजिक सुरक्षामा समेत असर परेको बताइन् ।

त्यस्तै होटल तथा पर्यटन क्षेत्रका श्रमिकको हकका लागि १० प्रतिशत सेवा शुल्क उठाउन र वितरण गर्न स्पष्ट कानुनी व्यवस्था गर्नुपर्ने उल्लेख गर्दै श्रम ऐन संशोधन गर्न पनि सरकारसँग माग गरेकी छिन् ।

कानुनी विवादका कारण होटल तथा पर्यटन क्षेत्रमा कार्यरत श्रमिकले सेवा शुल्क पाएका छैनन् । तर पहिले भने सेवा शुल्क पाउदै आइरहेका थिए । सेवा शुल्क नपाउदा श्रमिकको परिवारलाई समेत असर परेको उनको भनाई छ ।

‘श्रमिकको अधिकार भनेको पारिश्रमिकमा मात्र सीमित हुँदैन । उनीहरूको सामाजिक सुरक्षा सुनिश्चित गर्नु पनि राज्यको दायित्व हो,’ अधिकारीले भनिन्, ‘त्यसैले श्रम ऐन तत्काल संशोधन गरेर १० प्रतिशत सेवा शुल्क उठाउने र वितरण गर्ने स्पष्ट कानुनी व्यवस्था गरिनुपर्छ ।’

सांसद अधिकारी राष्ट्रिय प्रजातन्त्र पार्टीको तर्फबाट समानुपातिक सांसद हुन् ।