काठमाडौं । विद्युतीय सवारीको बजार राजधानी र ठूला सहरमा मात्र सीमित नरहँदै देशका अन्य क्षेत्रमा समेत विस्तार हुन थालेसँगै अथर नेपालले आफ्नो विद्युतीय मोबिलिटी सञ्जाललाई कर्णालीसम्म विस्तार गरेको छ। कम्पनीले सुर्खेतको वीरेन्द्रनगरमा आफ्नो १६औँ अनुभव केन्द्र (एक्सपेरियन्स सेन्टर) सञ्चालनमा ल्याएको हो।
नयाँ केन्द्र सञ्चालनमा आएसँगै सुर्खेतसहित कर्णाली क्षेत्रका ग्राहकले अथरका विद्युतीय स्कुटर, प्रविधि, बिक्रीपछिको सेवा तथा चार्जिङ सुविधासँग सम्बन्धित जानकारी स्थानीय तहमै प्राप्त गर्न सक्ने भएका छन्। कम्पनीका अनुसार यसबाट कर्णाली क्षेत्रमा विद्युतीय सवारीको पहुँच विस्तार हुनुका साथै ग्राहकको स्वामित्व अनुभवलाई थप सहज बनाउने अपेक्षा गरिएको छ।
वीरेन्द्रनगरस्थित अनुभव केन्द्रमा ग्राहकले अथरका पछिल्ला विद्युतीय स्कुटर अवलोकन गर्नुका साथै उत्पादनसम्बन्धी जानकारी, प्रदर्शन तथा परीक्षण सवारीमार्फत प्रत्यक्ष अनुभव लिन सक्नेछन्। केन्द्रमा विशेषगरी अथर ४५० सिरिज र अथर रिज्ता सिरिज उपलब्ध हुनेछन्।
अथर ४५० सिरिजलाई कार्यक्षमता, प्रविधि र दैनिक प्रयोगको व्यावहारिकतालाई संयोजन गर्ने गरी विकास गरिएको कम्पनीले जनाएको छ। यस सिरिजका पछिल्ला मोडलमा सवारी अनुभवलाई थप सहज बनाउन म्याजिक ट्विस्ट, इन्फिनिट क्रुज र भ्वाइस इन्टर्याक्सन जस्ता सुविधा समावेश गरिएको छ।
म्याजिक ट्विस्ट सुविधाले एक्सिलरेटर ग्रिप घुमाएर स्कुटरको गति घटाउन सहयोग गर्छ। यसले पटक–पटक ब्रेक प्रयोग गर्नुपर्ने आवश्यकता कम गर्ने कम्पनीको दाबी छ। त्यस्तै, इन्फिनिट क्रुज सुविधाले लामो दूरीको यात्रामा निश्चित गति कायम राख्न सहयोग गर्छ। भ्वाइस इन्टर्याक्सनमार्फत समर्थित विभिन्न सुविधामा आवाजबाट आदेश दिन सकिने व्यवस्था गरिएको छ।
अर्कोतर्फ, अथर रिज्तालाई पारिवारिक प्रयोगलाई केन्द्रमा राखेर विकास गरिएको विद्युतीय स्कुटरका रूपमा कम्पनीले प्रस्तुत गरेको छ। लामो सिट, आरामदायी बनोट तथा दैनिक पारिवारिक प्रयोगका लागि आवश्यक व्यावहारिक सुविधालाई प्राथमिकता दिइएको कम्पनीको भनाइ छ।
कर्णालीमा सेवा र चार्जिङ सञ्जाल विस्तार
विद्युतीय सवारीको बजार विस्तारसँगै ग्राहकका लागि बिक्रीपछिको सेवा र चार्जिङ पूर्वाधार पनि महत्वपूर्ण हुने भएकाले अथर नेपालले सेवा तथा चार्जिङ सञ्जाल विस्तारलाई समेत प्राथमिकता दिएको जनाएको छ।
कम्पनीका अनुसार हाल देशभर १० भन्दा बढी आधिकारिक सेवा केन्द्र र ५० भन्दा बढी तीव्र चार्जिङ केन्द्र सञ्चालनमा छन्। चार्जिङ पूर्वाधारको विस्तारले लामो दूरीमा विद्युतीय सवारी प्रयोग गर्ने ग्राहकको चार्जिङसम्बन्धी चिन्ता कम गर्न सहयोग पुग्ने कम्पनीको अपेक्षा छ।
अथरले विद्युतीय सवारीको स्वामित्वलाई थप विश्वसनीय बनाउन ‘एटसेभेन्टी ब्याट्री वारेन्टी’ पनि उपलब्ध गराउँदै आएको छ। लागू हुने सर्तअनुसार ब्याट्रीमा आठ वर्ष वा ८० हजार किलोमिटरमध्ये जुन पहिले आउँछ, त्यति अवधिसम्म वारेन्टी सुविधा उपलब्ध हुने कम्पनीले जनाएको छ। वारेन्टी अवधिमा ब्याट्रीको स्वास्थ्य ७० प्रतिशतभन्दा तल पुगेमा लागू सर्तअनुसार ब्याट्री परिवर्तनको सुविधा समेत उपलब्ध हुने कम्पनीको भनाइ छ।
कम्पनीले वीरेन्द्रनगरमा अनुभव केन्द्र विस्तारलाई केवल नयाँ बिक्री केन्द्र थप गर्ने कार्यका रूपमा नभई कर्णालीमा विद्युतीय मोबिलिटीको पहुँच विस्तार गर्ने प्रयासका रूपमा अघि सारेको छ। यसले राजधानी तथा ठूला सहरबाहिर पनि विद्युतीय सवारीको बजार विस्तारका लागि कम्पनीले आफ्नो सञ्जाल बढाइरहेको संकेत गर्छ।
असोज ११ सम्म विशेष योजना
वीरेन्द्रनगरमा नयाँ अनुभव केन्द्र सञ्चालनको अवसरमा अथर नेपालले असोज ११, २०८३ सम्म विशेष उद्घाटन योजना सार्वजनिक गरेको छ।
योजनाअन्तर्गत नगदमा स्कुटर खरिद गर्ने ग्राहकले एटसेभेन्टी ब्याट्री वारेन्टी प्राप्त गर्नेछन्। वित्तीय सुविधामार्फत खरिद गर्ने ग्राहकका लागि शून्य प्रतिशत ब्याजदरमा वित्तीय सुविधा उपलब्ध गराइने कम्पनीले जनाएको छ।
त्यस्तै, पुरानो सवारीसाधन साटेर अथर खरिद गर्ने ग्राहकले नियमित मूल्याङ्कनबाहेक थप ८ हजार रुपैयाँको मूल्याङ्कन सुविधा प्राप्त गर्नेछन्।
कम्पनीका अनुसार यी योजना सीमित अवधिका लागि मात्र लागू हुनेछन् र सम्बन्धित नियम तथा सर्तअनुसार सुविधा प्रदान गरिनेछ।
वीरेन्द्रनगरमा १६औँ अनुभव केन्द्र सञ्चालनसँगै अथर नेपालले कर्णालीको बढ्दो सहरीकरण र यातायात आवश्यकतालाई विद्युतीय मोबिलिटीसँग जोड्ने प्रयास गरेको छ। सेवा, चार्जिङ पूर्वाधार र बिक्री सञ्जालको विस्तारले कर्णालीमा विद्युतीय दुईपाङ्ग्रे सवारीको बजार विकासमा समेत प्रभाव पार्न सक्ने देखिन्छ।
लेखकको बारेमा
प्रतिक्रिया