काठमाडौं । बैंकिङ क्षेत्रमा गैरबैंकिङ सम्पत्ति थुप्रिदै गएपछि यसको व्यवस्थापनका लागि बैंकरहरूले नयाँ विकल्प अघि सारेका छन् ।
नेपाल बैंकर्स संघले आगामी आर्थिक वर्षको मौद्रिक नीतिका लागि सुझाव बुझाउँदै गैरबैंकिङ सम्पत्तिलाई भाडा (लीज) मा दिन पाउने गरी कानूनी व्यवस्था गर्न माग गरेको हो । अहिले बैंकहरुले यस्तो सम्पति आफैले प्रयोग गर्न वा भाडामा लगाउन पाउदैनन् । जसको कारण अबौंको सम्पत्ति अलपत्र परिरहेको छ ।
नेपाल राष्ट्र बैंकको तथ्यांकअनुसार चालू आर्थिक वर्ष (आव)को वैशाखसम्ममा बैंक, वित्तीय संस्थाहरूसँग गैरबैंकिङ सम्पत्ति ५४ अर्ब ११ करोड रुपैयाँ बराबरको छ । ३ वर्षको अवधिमा यस्तो सम्पत्ति १८९ प्रतिशतले वृद्धि भएको छ ।
बैंकहरुको खराब कर्जा वृद्धिसँगै धितो लिलामीसमेत हुन नसकेपछि गैरबैंकिङ सम्पत्ति उच्च भएको हो । बैंकहरूले लिलामबाट विक्री हुन नसकेको धितोलाई आफ्नो नाममा राख्दा गैरबैंकिङ सम्पत्तिका रुपमा राख्नुपर्छ ।
बैंकहरूको अधिकांश गैरबैंकिङ सम्पत्तिमा घरजग्गा रहेकाले भाडामा लगाउन पाउने व्यवस्था गर्न बैंकरहरूले माग गरेका हुन् ।
बैंकको नाममा आएको यस्तै सम्पत्ति उपयोगविहीन अवस्थामा रहेको र तत्कालै विक्री हुने सम्भावनासमेत नभएकाले भाडामा लगाउने व्यवस्था गर्न माग गरिएको नेपाल बैंकर्स संघले जानकारी दिएको छ ।
लेखकको बारेमा
प्रतिक्रिया